I Paris har dei fantastiske bagettar. Dei skal ha for det. Men me toppar dei så sinnsjukt når det kjem til grovbrød. Med blåbærsyltetøy eller brunost. Eller begge. Eg er glad i grovbrød som skal eltast, men eg er og skikkeleg glad i dei eltefrie brøda som du berre rørar kjapt saman og som lagar seg sjølv viss du berre gir det den tida det treng. Den siste tida har det blitt ein del grovbrød, litt etter kva som til ei kvar tid finst av mjølsortar, dette er den beste oppskrifta til no. Du kan variera hit og dit som du vil, men dette er bra. Verkeleg bra. Eg liker å berre røra saman ein deig seint på kvelden, så får det stå til dagen etter når eg kjem heim og så steiker eg det då. Det er kjempeenkelt, lagar lite oppvask og du har alltid ferskt brød. Sjukt verdt det.

Det er ikkje tvil om at dei aller beste og finaste brøda er dei runde frå jerngryte, men brødform gir ein fasong som går betre i matboksen, og som er lettare å handtera. Smaken er like god, og sjølv om skorpa vil vere meir imponerande i rund jerngryte-utgåve, er dette ein fin utfordrar, og så praktisk at det er denne me har mest av. Viss du vil må du endeleg gjerne laga fleire når du er i gong, dette blir berre eitt brød. Men igjen: Då har du ikkje alltid ferskt brød, kva?

 

Grovt eltefritt brød i brødform, eitt brød

  • 0,5 ts tørrgjær eller ei mengd fersk gjær som om lag ei ert
  • 1,5 ts salt
  • 200 g kveitemjøl
  • 150 g sammalt kveitemjøl, grovt
  • 150 g fint rugmjøl
  • 4,5 dl vatn
  • 1 ts honning

Rør saman det heile med ei skei, dekk med plastfolie og la det heva på kjøkkenbenken i 12-18 timar. Det skal vere ein våt deig.

Etter 12-18 timar heller du deigen på eit bakepapir du har strødd rugmjøl på. Brett deigen over seg sjølv ti-tolv gonger, og form det til eit brød. Viss deigen er klissete er det berre greitt, brødet blir saftig og fint det. Når altså deigen er forma nokon lunde som eit brød løfter du bakepapiret med brød og det heile over i ei brødform. Du kan eventuelt strø med frø eller kjernar eller godt salt eller kva som helst no, eg plar eigentleg det vere. La det etterheva i to timar.

Steik brødet, som no har heva seg til dobbel storleik, nedst i omnen, i førtifem minutt, og gjer det gjerne slik: Forvarm omnen til maks temperatur, men skru ned til 220 så snart du har hatt det i omnen. Det gir brødet eit lite ekstra løft. Viss brødet blir veldig mørkt oppå, så kan du legga eit bakepapir-ark over så det ikkje blir svidd, viss du er redd for det.