Sosekjøtt er ein av favorittane mine av tradisjonsmat. Her får det følge av ein veldig, veldig god rosenkålvariant, som kanskje ikkje er så tradisjonell i formen, men eit godt tilskot.
Dette tek litt tid å laga, men det er ikkje noko arbeid.
Sosekjøtt til to svoltne, etter Ingrid Espelid Hovig
- 400 g høyrygg el. utan bein, i gaffelstore stykker
- 1 lauk, i båtar
- 2 ss smør
- 3 ss kveitemjøl
- 4 dl vatn
- 1 laurbærblad
- 6 pepperkorn
- 1,5 ts salt
Brun kjøttet godt i ei varm gryte i smør. Steik gjerne litt og litt så det ikkje blir for mykje i gryta (då blir det kaldt). Ha i lauk og la han steika med nokre minutt. Rør inn mjølet. Ha i vatn og rør ut. La det koka på låg varme til kjøttet er møyrt. Rør av og til så det ikkje brenn seg. Om sausen blir for tjukk, spe med vatn.
Rosenkål med kvitlauk og chili
- 3 dl renska rosenkål, delt i to, gjerne små
- 2 ss smør
- 3/4 raud chili, i tynne skiver
- 3 fedd kvitlauk, grovhakka
- salt, pepper
Smelt smøret på låg varme, ha i kvitlauk og la det steika til han er mjuk. Ha i chili og rosenkål og steik til dei er møyre på middels varme. Dei skal få fin steikeskorpe, og kvitlauken skal bli sprø men IKKJE brent.
Server med kokte poteter.