Som stolt vestlending er det sjølvsagt pinnekjøt til jul. Helst i følge med komler, pølser og kålrabistappe. Til vanleg er det far som lagar julemat, men viss ein vil ha sånt før ein kjem heim til jul, så får ein jo ta tak då. Her har eg brukt binnebog, som er lammekjøt som er behandla på same måte som det meir tradisjonelle pinnekjøtet, men du får meir kjøt og litt mindre fett. Men for all del, bruk kva du vil, det blir mykje av det same.

Du kan gjere dette lett eller vanskeleg: Lett: Kjøp ferdige pølser og ferdig komlemjøl som berre skal blandast med vatn. Vanskeleg: Lag pølsene, komlene og pinnekjøtet sjølv – med salting og tørking og alt saman. Sidan eg ikkje har kjellar på studenthybelen (eller er SÅ entusiast, eg er berre 24), har eg skaffa ferdig pinnekjøt. Men pølsene og komlene er heimelaga, så då så. Oppskrift på pølser kjem eg tilbake til, for dei lager du uansett ikkje på same dag som alt det andre. Er ikkje overmennesker heller 🙂

 

Dagen før:

Vatne ut pinnekjøtet etter anvisninga. Det tek 12-24 timar alt etter kva du har kjøpt. Det står på pakken, eller du spør slaktaren. Skift vatn ein gong eller to.

 

Same dag:

 

Pinnekjøtet:

• ca 400-500 g pinnekjøt per person
• vatn
• poteter (dei blir fabelaktige på denne måten)
• litt honning

Du har vatna ut pinnekjøtet. Skrell nok poteter til å dekka botnen på ei romsleg gryte. Hell vatn på så det dekkjer godt opp på potetene. Stable pinnekjøtet oppå – det skal ikkje vere nede i vatnet. Ha lokk på, og la det dampa på svak varme i ca 3 timar til det er ferdig. Dei siste 20 minutta kan du ha pølsene på toppen og la dei dampa med.

Potetene vil ikkje gå i oppløysning, lovar. Dei held seg av ein eller annan grunn saman og blir gode og smakfulle. Smart kva?

Viss du vil ha sprøtt pinnekjøt: Ta ut pinnekjøtet, pensle det med litt honning og ha det under steikomnen til det blir bittelitt sprøtt på utsida.

 

Komler:

• 600 g rå poteter
• 200 g kokte poteter
• 1 ts salt
• 80 g byggmjøl
• 30 g kveitemjøl

Skrell og riv potetene. Bland inn salt, så mjøl. La røra kvila i ti-tjue minutt før du formar komler og har dei over i varm kraft (krafta MÅ koka når du har dei i). Trekk i om lag ein time. Restane skjører du i tjukke skiver og steiker til frukost i morgon.

 

 

Kålrotstappe:

Eg synst kålrotstappe er best viss det er ein blanding av ulike rotgrønsaker. Slik synst eg det er bra:

• 1 kårot
• 2 poteter
• 3 gulrøter
• 2 søtpoteter (fargen blir SÅ fin!)
• litt pastinakk
• fløyte
• 2 ms smør
• sky frå pinnekjøtet
• salt, peppar, muskatnøtt

Skrell grønsakene og skjær dei i grove biter. Kok dei i så lite vatn at det berre såvidt dekkjer. Hell av vatnet og mos godt, ha i litt fløyte til rett konsistens, smøret, nokre matskeier sky frå pinnekjøtet og smak til med krydder.

 

Tilbehør:

• Kokte poteter
• Sky frå pinnekjøtet
• Sirup til komlene

Viss du treng meir poteter til maten enn du kan bruka til å legga eit lag under pinnekjøtet, så må du koka dei ved sidan av. Server med sky, og viss du vil er det og sjukt godt med sirup til komlene. Det aller viktigste av alt er at du serverer maten heilt varm.